Football (Ligue 1) - Le SC Bastia monte sur le podium après son succès contre Guingamp (3-0)
(A redazzioni d'Alta Frequenza) - U diesel ùn hè più in vocula in Bastia, s'ellu si pensa à u principiu putenti di u Sporting in ssa Liga 1 dopu à u so successu 3-0 contr'à Guingamp. È certi rigrittarani d'essa stati presi inde l'ingorghi, parchì cinqui picculi minuti solu sò bastati à i bastiacci pà scriva a so prima rialisazioni grazia à Palmieri chì hà apprufittatu à a perfezzioni di un cumbugliu annant'à un corner. U Sporting ùn hà cappiatu nulla, cuntinuendu i so sforzi è fendu trimà a difesa brittona, pà falla cascà infini à a fin di u prima tempu. Ayité, dopu à una corsa solu, hà fattu un centru sopra misura pà Palmieri chì hà cuncretizatu cù un tiru aereu toccu da Baca à a 39ima. In u sicondu tempu, u Sporting s'hè calmatu appena pà cuncintrassi annant'à un travaghju difensivu propiu bè fattu, ancu s'è i visitori sò stati appena periculosi calchì volta. Ghjustu nanzi à l'ultimi minuti, u ghjovanu Coulibaly hà resu ancu più largu u successu di u Sporting dopu à un corner. Una sulidità chì parmetti à u Sporting d'avè setti punti annant'à novi pussibuli in trè partiti, un principiu putenti ricumpensatu da un postu annant'à u podium. Una piccula avanza chì parmittarà à i bastiacci d'essa di più sireni prima d'andà dui volti di fila in Saint Etienne è in Marseghja.
Steti à senta à Ghislain Printant, l'intrenori bastiacciu.
Sur le même sujet
