Football (Ligue 1) - Le SC Bastia recrute N'Gando
(A redazzioni d'Alta Frequenza) - Pà ss'ultimu ghjornu di u marcatu di i trasferimenti, u SC Bastia hà da cunnoscia muvimenti. Prima, à u nivellu di i partenzi, Christopher Maboulou, chì ùn ghjoca micca abbastanza, duvaria essa impristatu in Liga 2, in u Red Star. Un settori uffensivu chì duvaria cunnoscia dui ghjunti. A prima hè sicura, postu chì u mezu uffensivu cintrali è internaziunali ghjovanu francesi Axel N'Gando hè dighjà in Bastia è s'hè ingaghjatu pà trè anni cù u Sporting. À 22 anni, hè statu trasferitu da Rennes induv'ellu ùn s'hè micca impostu. T'hà u prufilu di u sicondu ghjucadori parfettu, o ancu di un cuncurrenti pà Sadio Diallo, postu ch'ellu esci da un imprestitu in Angers, induv'ellu hè statu un elementu maestru di a ricullata di u club in Liga 1 annant'à a siconda parti di a staghjoni. L'altru elementu novu saria pà u postu d'attaccanti, ed hè una vechja cunniscenza, u ghjucadori di Caen Florian Raspentino chì si duvaria ingaghjà pà dui anni. U ghjucadori algerianu di 26 anni hà dighjà purtatu in fatti a maglia bastiaccia trà u 2013 è u 2014, impristatu da l'Olympique di Marseghja. Dopu à una prima parti di staghjoni assai difficiuli annant'à u latu dirittu di l'attaccu bastiacciu induv'ellu ghjucava pocu, u so postu novu à l'attaccu, induv'ellu avia principiatu duranti u derby contr'à l'AC Aiacciu, l'avia fattu prò, postu ch'ellu avia scrittu cinqui rialisazioni in vintidui partiti di Liga 1.
Sur le même sujet
