Football (Ligue 1) - Le SC Bastia veut se remettre en selle face à Bordeaux
(A redazzioni d'Alta Frequenza) - Ssu sabbatu à sera à 8 ori, u SC Bastia, 13u ricevi i Girondins de Bordeaux, 8i, pà a 21a ghjurnata di Lega 1. È contr'à una squadra chì ferma nant'à un principiu di gattiva seria dopu avè vintu tanti volti di fila à a fin di a prima parti di a staghjoni, u Sporting si devi fà pardunà parechji cosi dopu una partita propiu catastrofica in Valenciennes, fora di a so ultima mez'ora. A settimana hè stata intensa, à u nivellu di u travaghju tennicu è tatticu, ma dinò fisicu, pà svighjà certi spiriti appena troppu addurmintati. L'intrenori bastiacciu, Frédéric Hantz, duvaria fà parechji cambiamenti impurtanti, lachendu à Khazri, Boudebouz è Palmieri nant'à u bancu, rimpiazzati da Ba, Ilan è Harek, mentri chì Yatabaré duvaria essa titulariu, chì Romaric duvaria ghjucà à fiancu à Squillaci in difesa cintrali, Modesto essendu micca prontu à 100% dopu a so ferita. Landreau ùn sarà micca quì, com'è Djibril Cissé, postu ch'elli sò feriti tramindui. Da nutà chì u sicondu di Jean Louis Leca sarà Christophe Samuel, guardianu chì hè passatu pà tanti clubs in CFA2 è DH è chì rimpiazzarà à Thomas Vincensini nant'à u bancu, postu ch'ellu hè feritu.
Steti à senta à Frédéric Hantz.
