Football (Ligue 1) - Mickaël Landreau raccroche les crampons
(A redazzioni d'Alta Frequenza) - Era un sicretu bè tinutu, u misteru intrattinutu, ma s'hè compiu dipoi ssa dumenica à sera duranti a ceremonia di i trufei UNFP, Mickaël Landreau cumpiarà a so carriera di guardianu sabbatu à l'uccasioni di a partita trà u Sporting Club di Bastia è u FC Nantes. Un'infurmazioni cumunicata da ellu stessu dopu chì l'Unioni Naziunali di i Ghjucadori di Ballò Prufiziunali l'avissi datu un trufeu d'unori pà tutta a so carriera. Scambiarà i so guanti contr'à un microfonu, quillu di Canal + duv'ellu divintarà cunsultanti à partasi di a staghjoni chì veni. Di fattu, sabbatu, u guardianu internaziunali francesi chì duvaria fà parti di i vintitrè ghjucadori ritinuti pà a Cuppa di u Mondu di u mesi chì veni à u Brasiliu, ghjucarà a so 618a è ultima partita di Lega 1. Un'ultima com'è un'uchjata lampata da u distinu, postu chì a so carriera avia principiatu cù un Bastia - Nantes, u 2 d'uttrovi di u 1996, duva ellu tinia, à diciassetti anni solu, a gabbia di u FC Nantes.
