Football (Ligue 1) - Toutes les dernières infos de l'AC Ajaccio

(A redazzioni d'Alta Frequenza) - A prisintazioni di Cédric Hengbart stamani (marcuri) in Timizzolu hè stata l’uccasioni pà u presidenti aiaccinu di parlà di l’effettivu pà a staghjoni chì veni.

Alanu Orsoni hà annunziatu chì cinqui o sei ghjucadori novi ghjunghjarani, soprattuttu par essa titularii, cù frà altru un laterali à manca di bunissima qualità, un difensori cintrali, un mezu di tarrenu è un attaccanti. I cartulari avanzariani bè. Pà ciò chì tocca à u futuru intrenori, u club hè intraccia di circà ni unu sicuramenti. L’ACA ricerca un intrenori chì t’hà assai sparienza cù un carattaru forti. Trè pussibilità sò studiati. U nomi di u prossimu coach duvaria essa cunnisciutu nanzi à u 10 di ghjunghju.

U difensori aiaccinu ghjuntu iss’inguernu, Ronald Zubar, hà datu u so accordu pà prunlungà in Aiacciu. Iss’ultimu chì hà suddisfatu assai duvaria essa – fora di una surpresa – sempri in rossu è biancu a staghjoni chì veni.

Pari ch’ellu sia l’unicu ghjucadori in fin di cuntrattu chì hà da cuntinuà à l’ACA, Sicondu u presidenti, altri ghjucadori, ancu certi chì t’ani sempri un cuntrattu, si ni duvariani andà, u numaru d’elementi à parta saria in tuttu di 12 oramai.

U difensori Yohan Poulard pudaria cuntinuà ellu in Aiacciu, ma micca forsa nant’à u tarrenu. U presidenti Alanu Orsoni hà dittu ch’elli riflittiani à a pussibilità di prupona una ricunversioni à u ghjucadori à l’ACA.

Adrian Mutu, dumandatu, sarà malgradu tuttu aiaccinu a staghjoni chì veni, sustinutu da un ghjucadori chì và in furia è putenti, ma a so identità ùn hè ancu cunnisciuta. Inveci, ùn si sà nulla pà ciò chì tocca à l’avvena di Memo Ochoa. Alanu Orsoni hà cunfirmatu l’intaressu di parechji clubs stragneri, in Italia, Ingliterra, Spagna, Francia è Grecia. Ma u guardianu internaziunali messicanu pudaria quantunqua cuntinuà in Aiacciu, è prulungà u so cuntrattu.

Pà ciò chì cuncerna l’effettivu, duvaria passà da 30 ghjucadori quist’annu à 23 pà 2013-2014, u club vulendu insista nant’à a qualità inveci di a quantità.

Infini, à u nivellu di l’infrastrutturi, i travaghji di a tribuna Honneur di u stadiu François Coty ani principiatu. A tribuna à meziornu, da u cantu di u mari, sarà cuparta iss’istati. A capacità di u stadiu sarà dunqua limitata à 7300 piazzi a staghjoni chì veni, u club vularia dunqua limità eccezziunalmenti l’abbunamenti pà issa staghjoni. Cù 7000 spettatori in medi issa staghjoni, si capisci chì a staghjoni chì veni pudaria essa cumplicata cù parechji scontri senza più nisun piazza à venda in furia. A capacità di u stadiu sarà dopu di 12 000 piazzi in u 2014.

U novu tarrenu d’intrenamentu sarà compiu ellu à u principiu di u mesi di lugliu. Issi novi infrastrutturi pà u centru di furmazioni è a riserva sò accanti à u stadiu. Ci hè un novu stadiu, cù un tarrenu sinteticu, una tribuna, spugliatoghji novi è un dispusitivu di lumi. Rammintemi chì u centru di furmazioni sarà ricunnisciutu da a FFF tali è quali à u mesi di ghjunghju.