Football (Ligue 1) - Un SC Bastia laborieux ramène le nul de Nantes (0-0)
(A redazzioni d'Alta Frequenza) - S'è da un puntu di vista di u ghjocu à ballò, u Sporting Club di Bastia ùn hà mustratu nulla, ss'assenza d'ambizioni in u ghjocu avarà parmissu à u minimu di tena a partita à 0-0 in Nantes. Fora di un lob di Cahuzac ghjuntu à scrasassi annant'à a barra di Riou ind'i primi minuti, u Sporting ùn sarà mai statu uffensivu, propiu incapaci d'essa periculosu. Ci pudemi ancu dumandà s'è i ghjucadori di Ghislain Printant erani ghjunti in un atru scopu cà quillu di tena u 0-0, un affari chì ùn hè micca statu faciuli malgradu tuttu, i bastiacci manchendu di fassi puniscia parechji volti contr'à lucali strampalati, o truvendu à Jean Louis Leca, ultimu muru solidu è chì rassicureghja pà una squadra debbuli à u nivellu difensivu. À partasi di l'ora di ghjocu, Ghislain Printant hà dicisu di dà tuttu pà a difesa, u Sporting mittendu in i so stacchi l'ambizioni uffensivi povari dimustrati in contru. A sclusioni di u nantesi Bedoya à calchì minuta di a fini ùn hà cambiatu nulla. S'è ssu puntu di u risultatu à paru parmetti à i bastiacci di sorta u capu da a zona rossa, cunghjucatu à a disfatta di Lille nova prima squadra in a zona rossa, a partita in ella stessa ùn hà nulla chì rassicuressi pà a seguita, postu chì nisun inchietudini hè statu sguassata duranti ssa partita.
