Football (Ligue 2) - Déroute du CA Bastia à Troyes (1-6)
(A redazzioni d'Alta Frequenza)- Issu Vennari, in u quadru di a dicesima ghjurnata di Lega 2, u CA Bastia s’hè cumpletamenti sbullonatu in Troyes, pirdendu nantu à a marca pisanti assai di 6-1. Un schjaffu quantunqua stunenti pà un club chì di sicuru, ùn avia ancu vintu fin ad avà, ma chì ùn avia mai persu cù un scartu maiori à u liveddu di u tavuloni. Moltu più chì à l’ora di ghjocu, Troyes ùn duvanzaia cà d’un scopu grazia à Nivet à a 29a. U scopu di Psaume à a 67a pari avè sunatu i chjocchi, chì ghjè dopu à quissu chì Troyes hà infilzatu i scopi cum’à peruli, cù Nivet à a 76a, Psaume à a 78a è Othon à a 89a. È mentri ch’omu pinsaia u CAB salvatu in l’onori cù un scopu di Cropanese à l’iniziu di u tempu di ricuperu, Jean hè ghjuntu à dà l’ultima fraiata à a 91a. À a classifica, u CAB hè vintesimu cù quattru punti iscritti, trè di ritardu nantu à u prima ricattevuli è una sfarenza di scopi catastrofica, senza cuntà u murali chì ùn pò essa più i bassu dopu à una tali scunfitta.
