Football (Ligue 2) - GFCA-ACA le 15 août à Ange Casanova
(A redazzioni d'Alta Frequenza) - I calendarii di i campiunati di Liga 1 è Liga 2 sò stati publicati da a Liga di Ballò Prufiziunali. Pà contu soiu, i dui clubs aiaccini, l'ACA, chì fala da a Liga 1, è u GFCA, chì colla da u Naziunali, si lanciarani ind'u campiunatu di Liga 2 u prima d'aostu. L'AC Aiacciu principiarà a so staghjoni cù un viaghju in Arles Avignon, mentri chì u Gazélec d'Aiacciu ricivarà in Mezavia un anzianu club di prima divisioni, Valenciennes. Scontru putentissimu pà a 2nda ghjurnata trà dui pizzoni di Liga 2, postu chì a furmazioni di u presidenti Orsoni hà da accoglia u FC Sochaux Montbéliard, mentri chì i Diavuli Rossi andarani in Nurmandia pà ghjucà contr'à Le Havre. Infini, a prima partita di u derby aiaccinu tantu aspittatu, ed hè forsa un segnu, si ghjucarà in Ange Casanova pà a 3a ghjurnata, u 15 d'aostu, ghjornu di Santa Maria, Santa Patrona di a cità, chì hè dinò a data anniversariu di a nascita di Nabuliò. U sicondu scontru in Timizzolu sarà u 23 di ghjinnaghju di u 2015.
