Football (Ligue 2) - Le CA Bastia crée l'exploit à Nancy (1-0)
(A redazzioni d'Alta Frequenza) - U campiunatu di Lega 2 hè carcu à surpresi parchì dopu una disfatta contr'à Niort a settimana scorsa in Furiani chì l'avia guasgi annigatu, u CA Bastia hà riagitu cù a più bella manera cù a so siconda vittoria di a staghjoni, torna fora di i so lochi, nant'à u tarrenu di l'AS Nancy Lorraine, 1-0 pà i cabisti. Contr'à una squadra chì firmava nant'à cinqui vittorii di fila, u CAB hà subitu ben intesu a duminazioni di u so avversariu, ma stavolta, i corsi ani fattu i sforzi chì ci vulia pà tena contr'à l'attacchi di i lucali è vultà à a pausa cù un risultatu à paru. Ind'u sicondu tempu, Nancy duminava sempri, ma u CAB, efficaci in difesa, hà cuminciatu à divintà più prisenti ind'u settori uffensivu, è hà viaghjatu, ancu contr'à u filu di u ghjocu. In fatti, à a 71a minuta, Jonathan Rivas hà fistighjatu cù a più bella manera u so primu scontru cù u CAB trapassendu nant'à una billissima corsa a difesa di Nancy pà batta u guardianu. Dopu, i cabisti sò riisciuti à tena contr'à lucali ditarminati pà egualizà. Dopu à un'ultima minuta cù una piccula baruffa trà i dui squadri è a sclusioni di Truchet ind'u CAB è di Grange pà Nancy, i bastiacci pudiani fà schjattà a so gioia à a fin di a partita. Cù dodeci punti, u CAB t'hà oramai setti punti di menu di pettu à a prima squadra fora di a zona rossa.
Sur le même sujet
