Football (Ligue 2) - Le Havrais Ghislain Gimbert à l'AC Ajaccio (2 ans + 1)
(A redazzioni d'Alta Frequenza) - L'infurmazioni hè stata publicata da France Bleu Nurmandia è sarà ufficializata da quì à pocu, l'attaccanti di u Havre Ghislain Gimbert, attaccanti u più pruduttivu di L2 in attività, raghjunghji l'AC Aiacciu pà dui staghjoni, cù un'antra in uzzioni. Si sapia chì l'ACA circava un attaccanti di sparienza è studiava parechji pussibilità, cù frà altru quilla di u Nurmandu. Hè quissa quì chì saria sbuccata. D'appressu à France Bleu Nurmandia, u ghjucadori di guasgi 32 anni saria statu cunvintu da u prughjettu di u club aiaccinu è da u discorsu d'Olivier Pantaloni. Si tratta di una ghjunta di prima scelta pà l'ACA. Ghislain Gimbert hà ghjucatu più di 400 partiti in prufiziunali è hà scrittu più di 100 rialisazioni à u più altu nivellu. Hà purtatu i culori di Grenoble, Tours, Vannes, Laval, Zulte Waregem è Le Havre, duranti i dui ultimi staghjoni, induv'ellu hà participatu à 66 scontri di Liga 2 pà 16 rialisazioni. Cuntattatu da Brest, Tours, Lens o ancu da u Sparta Rotterdam, hà dunqua sceltu a Corsica. Hè u cinquesimu ghjucadori novu di u club aiaccinu dopu à Marin (Nîmes), Avinel (Clermont), Coutadeur (Laval) è Wissa (Angers). U capitanu di u Red Star, Jérôme Hergault, avaria trovu un accordu cù u so anzianu club, è si duvaria ingaghjà in furia cù l'ACA.
Sur le même sujet
