Football (Ligue 2) - Le SC Bastia arrache le nul face au RC Lens (2-2)
(Julien Pernici – Alta Frequenza) - Issu sabbatu, u Sporting ricivia u RC Lens pà un affissu degnu di a Lega 1. Ma malgradu u sustegnu di più di 10000 sustenidori, i ghjucadori di Federicu Hantz ùn ani pussutu buscà si chè un risultatu à paru, 2 reti à 2. S’è i dicisioni di l’abitru sò andati calchì volta à prò di Lens, i bastiacci ùn si sò micca facilitati l’affari. Circhendu si fisicamenti è tennicamenti, ùn sò micca riisciuti à entra ind’a so partita, è ani cuncessu in fini una reta à a 27ima minuta di Pollet. Deci minuti dopu, nant’à un sbaghju difensivu, Eduardo, purtava l’affari à dui à zeru. Malgradu tuttu, nanzi à a pausa, Maoulida ridava calchì spera à Sporting, à a 44ima minuta. Ind’u sicondu periudu, u ghjocu bastiacciu s’hè mighjuratu, è senza daveru essa bonu, u Sporting hà egualizatu à a 83ima minuta, grazia à Diallo. A fini di a partit hè stata marcata da una viulenti baruffa ghjinirali, chì hà vistu Cioni sclusu da u cantu bastiacciu, ma dinò Sow et Cichero, da u cantu Nurdistu. Incidenti sopra à i quali vultaremi dumani (luni). Malgradu tuttu, u Sporting ritrova u so 3u postu.
Sur le même sujet
