Football (Ligue 2) : Le stade Ange-Casanova du GFC Ajaccio suspendu à titre conservatoire
(A redazzioni d'Alta Frequenza) - A cummissioni di disciplina di a LFP hà asaminatu dui cartulari nant'à u GFC Aiacciu. Ind'u primu, cunsecutivu à u scontru Lens - GFCA, Olivier Miniconi, u presidenti di u club, hè statu suspesu fin'è aostu di u 2014 di bancu, di lucali d'arbitri è di funzioni ufficiali, pà avè missu un calciu à un ghjucadori di Lens duranti una baruffa ghjinirali à a fini di u primu tempu. U sicondu cartulari, quillu di a partita GFCA - Monacu, costa assai di più caru à l'aiaccini. In fatti, quissi quì duvarani truvà una tarrenu di rimpiazzamentu in cuntinenti pà i so scontri in casa, u stadiu Ange Casanova essendu suspesu di manera cunservatoria fin'è a fini di a struzzioni di u cartulari nant'à parechji incidenti contr'à l'arbitri. Sempri inde issu cartulari, Fanfan Tagliaglioli, presidenti di l'associu, è Toussaint Luciani, direttori di l'urganisazioni è di a securità, sò stati suspesi di modu cunservatoriu. Sicondu a LFP, Fanfan Tagliaglioli, è un dirighjenti micca identificatu avariani "insultatu è minacciatu di morti l'arbitru" à u mumentu di a pausa di a partita. Sempri sicondu a LFP, i quattru arbitri, Tony Chapron in testa, dopu à l'introduzzioni di parechji parsoni nant'à u tarrenu, cù un'autorisazioni o senza, "ani pussutu vultà ind'i so lucali solu cinqui minuti dopu avè ricivutu insulti, minacci, intimidazioni è puntati nant'à u tarrenu, mentri chì u quartu ufficiali hè statu minatu in capu parechji volti".
Ecoutez la réaction du président délégué du GFCA, Olivier Miniconi.
