Football (National) - Dernière chance de maintien pour le CA Bastia face au Paris FC
(A redazzioni d'Alta Frequenza) - Spirà un miraculu furzendu u distinu, eccu u scopu di u CA Bastia pà l'ultima partita di a staghjoni in Naziunali cù a ghjunta di u Parighji FC. U CAB si pò sempri mantena grazia à circustanzi chjari è netti, vali à dì una vittoria, un affari chì ùn sarà micca faciuli contr'à una squadra annant'à u podium è chì vularà assicurà a so cullata in Liga 2, cunghjucata à una disfatta di Chambly, chì ricevi a furmazioni d'Istres, dighjà cundannata. Senza què, u quindicesimu postu, quillu di primu club ind'a zona rossa, pudaria essa assicurata pocu impremi u risultatu, postu chì u CAB hà postu una riserva contr'à Colomiers, 15imu, chì pudaria fà perda un puntu à ssu club. Bastaria pà ricullà è trapassà à Colomiers à u goal average, postu chì ss'ultima squadra ùn hà micca massi pussibilità di buscassi u minimu puntu in Strasbourg chì ghjucarà dinò ellu a so piazza in Liga 2 davanti à 26 000 parsoni. Un postu chì pudaria valè un mantenimentu amministrativu di pettu à i prublemi di i clubs di Naziunali ss'ultimi anni.
Steti à senta à Stéphane Rossi, l'intrenori di u CAB.
