Football (National) - Le CA Bastia étrille le Red Star (5-1)
(A redazzioni d'Alta Frequenza) - In Naziunali, u CA Bastia hà fattu una dimustrazioni contr'à u Red Star, cù una vittoria assai larga, 5-1. Eppuru, sò i franciliani à a surpresa ghjinirali chì ani scrittu a prima reta cù Lafon à a dicesima minuta, nant'à a so sola vera uccasioni di a partita. À a quindicesima minuta, Pastorelli hà egualizatu cù un'incapata, N'Diaye duppiendu l'affari dui minuti dopu, aiutatu da un difensori di u Red Star. Un scartu chì à a fini di u primu scontru ùn rispichjava micca a fisiunumia di una partita duminata solu da u CAB, chì hà ghjucatu in superiorità numerica à partasi di a 40a minuta dopu à un gestu periculosu di Meliani nant'à Pastorelli. Dopu à a pausa, Traoré feci trimà i reti à a 48a minuta nant'à un lob à l'intrata di i 16i metri. Sei minuti dopu, Traoré torna hà scrittu a quattriesima reta bastiaccia, aiutatu quì dinò da un difensori appena strampalatu. Infini, à a 62a, Pastorelli vinia à chjoda u successu cabistu. Cù i so 39 punti, u CAB hè oramai più vicinu da u podium cà di a zona rossa cù dui partiti in ritardu; a missioni mantenimentu hè dunqua bè ingaghjata pà i ghjucadori di Stéphane Rossi.
Sur le même sujet
