Football : un "coup de gueule" à la mode de Caen
(A redazzioni d'Alta Frequenza) - Cronaca di un razzisimu urdinariu o rubrica spurtiva rializata da un veru ghjurnalistu prufessiunali? A quistioni si pò pona dopu à u "Coup de gueule" difusatu calchì ghjornu fà nant'à Tendance Ouest, una radiu di u rughjoni di Caen. Si veda di più in più, hè à a moda è dipoi un pezzu, pà a stampa naziunali è dimula franca francesi, di fà li falà à più pudè nant'à tuttu ciò chì, da luntanu o da vicinu, nant'à tuttu ciò chì tocca à a Corsica. Di què n'avemi presu partitu è ci ni purtemi propiu bè. Ma l'affari sò in francesi, com'ellu si dici, quandu chì un ghjurnalistu si lancia ind'una vera critica non solu contr'à u ballò corsu ma dinò ver di una pupulazioni sana. Chì u crunista si rassicuressi, ùn li mandaremi micca una mansa di sparadori nè una squadra da metta un bomba, da metta in periculu i so ghjorni. Dopu à a presa à pitrati di u bus di i ghjucadori di Caen, cundannatu quì da tutti, u crunista limiteghja a so "accumpulera di fatti simuli" à i soli squadri d'Aiacciu è di Bastia, è più in dà à a Corsica sana, fendu mostra quì di pocu prufessiunalisimu in materia di cumpurtamentu sviatu di ghjocu à ballò. Trapassa ancu i limiti quand'ellu dumanda cù forza è sicurezza a sradichera simplici è ditta di i squadri corsi di i campiunati di Francia prufessiunali. Da ùn cuntinuà micca à cumintà u cumentu è d'ùn essa accusatu di qualsiasi paranoia, emi presu u partitu di difusa di modu sanu issu famosu "Colpu di scuntentezza"; pudeti cusì fà vi u vostru parè propiu è fà ci sapè, parchì micca, u vostru sintimu nant'à issu sughjettu.
