Forte pression incendiaire en Haute-Corse
(A redazzioni d'Alta Frequenza) - Cresci sempri di più a prissioni di pettu à i fochi in Corsica Suprana, cù guasgi una decina di fochi trattati o in traccia d'essa trattati dipoi ssu marti à sera. Parechji fochi sò partuti duranti a nuttata è in bor di strada, ciò chì metti i mezi di lotta propiu à cuntribuzioni. U più impurtanti hè statu arrighjistratu à mezanotti guasgi è vinti, à u nivellu di a D38 in Barbaghju, cù trà 20 è 30 ettari di vegetazioni distrutti da i fiari. Una sissantina d'omi, appughjati in alternenza da trè Canadair è trè Tracker, sò mubilizati. U Curtinesi hè dinò è particularmenti toccu da i fiari, a prova si n'hè cù parechji fochi censati, com'è l'ultimu in Erbaghjolu, induva un elicotteru chì lampa l'acqua agisci sopralocu cù spinghjifochi nant'à u tarrenu. U SDIS di Corsica Suprana chjama a pupulazioni à a vigilenza a più maiò ma soprattuttu à u civisimu è à u spiritu di rispunsabilità di tutt'ognunu (ritrattu : Jonathan Mari)
