François Alfonsi dénonce la baisse des fonds européens pour la Corse en 2014-2020
(A redazzioni d'Alta Frequenza) - -9,9%. U sciffru hè chjaru, hè quillu di a calata di i mezi dati à a Corsica ghjunghjendu da u FEDER è u FSE distribuiti da l’Auropa à a Francia trà u 2014 è u 2020. Una calata chì faci nascia a collara di u diputatu aurupeu, François Alfonsi pà parechji raghjoni. Prima, a Francia hà vistu a so dutazioni crescia di 7,1%, ed hè unu di i scarsi paesi maiò à ùn avè micca cunnisciutu una calata da Brussels. Altra curiosità di i sciffri uttenuti da u diputatu aurupeu, a Corsica, chì vedi a so dutazioni passà da 137,6 millioni à 124 millioni, hè u solu rughjoni di transizioni à veda quissa quì calà, postu chì u parlamentu aurupeu hà missu in ballu ssu dispusitivu da fà chì ssi rughjoni sighini spiccati da i rughjoni più sviluppati è pudessini riceva di fattu di più soldi par ogni abitanti cà prima. Altra surpresa più impurtanti, u rughjoni, fora di i DOM TOM, chì vedi a so dutazioni crescia u più hè l’Ile de France, chì cù 25,2% di crescita hè missu propiu in avanti malgradu un PIB par ogni abitanti chì raprisenta più di u doppiu di quillu di a Corsica, mentri chì ssi cresciti di dutazioni t’aviani com’è scopu, d’appressu à François Alfonsi, di dà aiuti in più à i rughjoni isulani.
Steti à senta à François Alfonsi.
Sur le même sujet
