François Hollande ne parlera de rien d'autre que de la Libération de la Corse lors de son séjour sur l'île
(A redazzioni d'Alta Frequenza) - Ghjera bè ciò chì no pisaiami, François Holande ùn ghjunghjarà micca dumani (Vennari) in Corsica pà evucà un qualunqua prublema di a vita oghjinca di l'isula. Hè stata affirmata, stamani, à l'uccasioni di u breifing, incù i servizii di cumunicazioni di l'Elysée. U prisidenti di a Ripublica venerà in l'isula pà parlà unicamenti di a Libarazioni di a Corsica, è essenzialmenti di què. À nisùn mumentu sarà evucatu, in tutti i casi in i presi di pusizioni ufficiali, nè di l'enventuali evuluzioni istituziunali di l'isula, nè di a lingua corsa, neancu d'altri prublemi chì ci intarissani assai assai oghji. À l'uccasioni d'un pranzu, dettu Riublicanu, François Hollande scuntrarà i parlimentarii di l'isula, i prisidenti di l'Assemblea di Corsica è di l'Esecuttivu, è dinò l'associi di merri di i dui dipartimenti. Ma surpresa, chì ci sarà quantunqua un raprisintanti di a famidda naziunalista à issu pranzu. U diputatu europeanu François Alfonsi -ùn si pudia fà altrimenti- sarà anch'iddu invitatu. Quantunqua, à l'uccasioni d'issu pranzu, l'eletti, di forza, ùn mancarani micca d'evucà tutti issi quistioni quì. È ci ne vultaremi dunqua versu d'iddi, pà forsi, fà vi parti di ciò ch'iddu si pudaria essa dittu.
