François Tatti écarté de la présidence du groupe Gauche Républicaine
(A redazzioni d'Alta Frequenza) - Ind'un cumunicatu ghjuntu ind'a nostra redazzioni, i membri di u gruppu Gauche Républicaine à l'Assemblea di Corsica dicini ch'elli ani sceltu à Pascaline Castellani com'è nova presidenti, chì rimpiazza à François Tatti. U gruppu aghjusta ch'ellu hà "accittatu a situazioni nova criata da u votu di u so presidenti, François Tatti" dunqua, "à prò di una dumanda di riforma custituziunali". I membri di u gruppu rammentani di fattu "l'ingaghjamentu presu in u 2010 da a lista Gauche Républicaine davanti à l'alittori di ricusà qualsiasi aventura istituziunali nova duranti a mandatura attuali". Aghjustemi dinò chì ùn hè micca pricisatu in ssa cumunicazioni quì s'è François Tatti faci sempri parti o micca di u gruppu Gauche Républicaine. Rammintemi par asempiu chì à l'uccasioni di disaccordi pulitichi custatati, Paulu Felici Benedetti si n'hè andatu da u gruppu Corsica Libera è chì pà a listessa raghjoni Véronique Sciaretti hà tuttu simpliciamenti demissiunatu da ssu gruppu quì. Un episodiu novu pà François Tatti, dopu à a so sclusioni calchì settimana fà di u PRG par via di a so dicisioni di parta da u so cantu pà i municipali di u 2014 in Bastia.
