François Tatti tire à boulets rouges sur le PRG et Jean Zuccarelli après son exclusion du parti
(A redazzioni d'Alta Frequenza) - Arimani (marcuri), u Partitu Radicali di Manca à u nivellu naziunali hà presu a dicisioni di scluda à François Tatti par via ch'ellu parti solu pà i municipali di u 2014 in Bastia, duva ellu si prisintarà contr'à, par asempiu, u candidatu sceltu da u partitu Jean Zuccarelli. A riazzioni di François Tatti ùn s'hè micca fatta aspittà, ed hè più cà putenti. Par ellu, ssa dicisioni di u PRG "ùn unureghja micca i so dirighjenti è svalurizeghja un partitu chì ùn avia mai sclusu à nimu in Corsica. Ùn avia micca sclusu un PRG chì partia da u so cantu pà l'ultima alizzioni tarrituriali, ch'ellu hà vintu infini, mancu appena quandu si trattava di François Vendasi, candidatu à una certa epica contr'à l'ultimu diputatu PRG, Emile Zuccarelli." Ind'a seguita di u cumunicatu, si pò dì chì l'elettu tarrituriali tira à balli rossi contr'à Jean Zuccarelli, senza dì u so nomu, dumandendu si s'è u PRG avaria "fattu ss'eccezzioni quì s'è u so candidatu s'era impostu di manera naturali cù a so azzioni, i so riesciti o u so carismu" è cunsidareghja chì si tratta di "un'azzioni pà pruvà à impona una nova successioni famigliali à una pupulazioni chì ùn ni voli più". Infini, falani i cutrati nant'à l'unioni assai pussibuli di a manca, postu chì l'anzianu omu forti d'Emile Zuccarelli a qualificheghja di "parudia d'unioni di a Manca custruita micca nant'à un prughjettu puliticu, ma nant'à una simplici spartera di i posti".
