Fusion de régulation médicale SAMU 2B / SDIS : la réponse de Paul Giacobbi

(A redazzioni d'Alta Frequenza) - L’Assemblea di Corsica hà fattu dunqua ssu ghjovi da mani a so riintrata cù una seenza publica nova. Prima d’amintà dopu meziornu parechji cartulari, com’è quillu di u bughjettu supplementariu 2015, cunsighjeri tarrituriali è membri di l’Esecutivu ani participatu à a famosa seenza di i dumandi urali. A prima hè stata posta da a cunsighjera di l'Eletti Cumunisti è Citadini di u Fronti di Manca Josette Risterucci, annant'à a fusioni di rigulazioni medicali trà u SAMU di Corsica Suprana è u SDIS 2B. Faci sapè chì u parsunali di u SAMU 2B è quillu di l'uspidali di Bastia ani avutu a surpresa di scopra duranti a statina chì u centru tennicu di chjami di u SDIS di Corsica Suprana duvia accoglia u centru 15 di i chjami di Bastia. Una nutizia amparata grazia à vuciata d'appressu à Josette Risterucci, è micca direttamenti da a direzzioni di l'uspidali, mentri chì u 23 di lugliu scorsu duranti una riunioni cù tutti l'attori cuncirnati, era statu annunziatu chì ss'azzioni ùn era micca d'attualità. Ma, ssu cartulari era dighjà bè avanzatu sicondu a cunsighjera, in discussioni micca di manera ufficiali dipoi anni è anni. I dui SAMU di Corsica volini tena ind'i so stabilimenti un centru regiunali di chjami pà l'uspidali, tuttu què in cuuperazioni è grazia à cunnessioni cù i CTA. Una situazioni chì intarveni dinò in un cuntestu difficiuli, quillu di a mudernisazioni assai aspittata di l'uspidali di Bastia. U presidenti di l'Esecutivu di Corsica hà rispostu à a dumanda di a cunsighjera tarrituriali. Pà Paul Giacobbi, ancu s'è a CTC ùn hà micca cumpitenzi in materia di saluta, ferma infurmata di ciò chì si passa. I cosi duvarani essa ripresi, cù tutta a cuncertazioni nicissaria è l'adunita di tutti i partinarii. U presidenti di l'Esecutivu hà annunziatu da un'antra banda, cuncirnendu u cartulari di a mudernisazioni di l'uspidali di Bastia, chì ci sarà un scontru da quì à calchì sittimana cù u cabinetu di a ministra di a Saluta.

Steti à senta à Paul Giacobbi.