Futur hôpital d'Ajaccio et clinique privée : la mise au point
(A redazzioni d'Alta Frequenza) - A carta di creditu contr'à a carta vitali ! Era a maghjina putenti è angusciosa purtata da i sindicati di l'uspidali di a Miséricorde d'Aiacciu. A dicisioni d'aghjustà à u prughjettu iniziali di un uspidali publicu novu una clinica privata faci nascia u timori di i parsunali di l'uspidali publicu. U STC prima, eppo a CFDT, duranti cunfarenzi di stampa, ani vulsutu fà senta cù forza i so inchietudini è i so uppusizioni à ssu prughjettu. Di pettu à l'argumenti prisintati da i sindicati, si pinsava bè chì l'Agenza Regiunali di a Saluta è i prumutori di a clinica privata ùn stariani micca zitti duranti centu anni. À l'uccasioni di una cunfarenza di stampa urganizata à l'ARS oghji (marcuri), Jean Jacques Coiplet, Jean Paul Houllier è Jean Canarelli ani vulsutu pricisà bè i cosi. Sicondu u direttori di l'Agenza Regiunali di a Saluta, quillu di l'uspidali di a Miséricorde è quillu dinò di a clinica futura, i cosi sò assai simplici, simplici à prima vista solu parchì u prughjettu hè propiu cumplessu. Un affari hè sicuru in tutti i casi : sarà un prughjettu induva tuttu u mondu sarà vincitori, com'ellu a ci dici Jean Jacques Coiplet.
Steti à senta à Jean Jacques Coiplet, u direttori di l'ARS di Corsica.
