Gilles Simeoni et Jean-Guy Talamoni à Matignon : sentiment mitigé
(A redazzioni d'Alta Frequenza) - Micca famosu ! Hè cusì ch'è no pudariami qualificà u scontru di ssu luni in Matignon trà u presidenti di l'Esecutivu di Corsica Gilles Simeoni, u presidenti di l'Assemblea di Corsica Ghjuvan Guidu Talamoni è u Prima ministru Manuel Valls. Cuufficialità, annistia di i prighjuneri pulitichi, statutu di residenti : ssa riunioni avarà parmissu soprattuttu di cunfirmà i disaccordi trà i rispunsevuli pulitichi i più alti di l'isula è u Statu. I trè omi si sò raghjunti annant'à un puntu à u minimu, quillu di u sviluppu ecunomicu. U Prima ministru hà prupostu dinò a criazioni di trè gruppi di travaghju trà l'eletti di a Corsica è sfarenti ministeri : unu annant'à a quistioni di lingua corsa, unu chì cuncerna l'istituzioni è l'intercumunalità è un ultimu pà ciò chì tocca u prublema fundariu. S'è da un puntu di vista puliticu a porta ferma sarrata, Gilles Simeoni ferma quantunqua ditarminatu à cunvincia u Statu ch'ellu devi cambià di pulitica in Corsica.
Eccu a riazzioni à caldu di u presidenti di u Cunsighju esecutivu.
