Gilles Simeoni et une partie du conseil d'administration de l'hôpital de Bastia en visite dans les locaux
(A redazzioni d'Alta Frequenza) - Ssu ghjovi, Gilles Simeoni, u merri di Bastia è presidenti di u cunsighju di survighjenza di l’uspidali di Bastia, accumpagnatu da u direttori pruvisoriu di l’uspidali, Antoine Tardi, è altri membri di u cunsighju d’amministrazioni di l’uspidali, hà passatu una ghjurnata di visita larga di parechji servizi, chì hà da cuntinuà à un antru mumentu. Un’iniziativa nova pà un merri di Bastia è chì hà parmissu scambii cù i parsunali. U finanziamentu di l’uspidali hè statu à u centru di i discussioni. In fatti, di i 29 millioni d’auri prumissi da u ministeru di a saluta o, à u nivellu più lucali da l’ARS ind’u quadru di a mudernisazioni di l’uspidali, solu 15,5 millioni sò ghjunti o ani da essa accurdati in furia. Si tratta di una parti di 11,5 millioni pà un tempu chì và fin’è u 2021 da a parti di u Statu, è di 4 millioni da a parti di l’ARS, una parti di ssi soldi essendu stati rimandati micca annant’à l’investimentu ma annant’à u funziunamentu par via di i prublemi di mezi di l’uspidali. Ci voli à dì chì l’altra parti di l’11,5 millioni d’auri prumissa da u Statu ùn hè ancu à entra, è soprattuttu ch’ella hè privista par essa cunsacrata di manera sana à aiutu à l’imprestu, vali à dì à participà à u rimbursamentu di un imprestu propiu più impurtanti chì l’uspidali duvarà truvà da par ellu, dui altri millioni essendu aspittati da a parti di l'ARS.
Steti à senta à Jean Claude Mouriès, medicu è presidenti di a cumissioni medicali di l’uspidali chì hà trovu un presidenti di u cunsighju di survighjenza di l’uspidali à l’ascoltu.
