Grève SNCM : les socioprofessionnels de Corse plus que jamais mobilisés
(A redazzioni d'Alta Frequenza) - Principia una sittimana nova ind'u cunflittu di a SNCM, a terza oramai è què pà ssu principiu d'istati criticu. I porti di Corsica ani cunnisciutu in fatti ssa dumenicata una mossa impurtanti : 50 000 viaghjadori erani aspittati in Bastia è più di 30 000 in Aiacciu; vi daremi da quì à pocu un bilanciu pricisu di a situazioni. In ssu mentri, ùn s'hè passatu nulla di particulari duranti ssa dumenicata, fora di a dichjarazioni di Frédéric Cuvillier sabbatu. In fatti, u secretariu di Statu à i Trasporti hà dittu di manera chjara ch'ellu battia à prò di l'addirizzamentu ghjudiziariu di a SNCM. D'appressu à ellu, hè l'unicu mezu pà dà torna un avvena à a SNCM par ch'ella ripighjessi u so postu cintrali ind'i trasporti marittimi in Mediterraniu. Pricisemi chì a suluzioni di l'addirizzamentu ghjudiziariu parmetti à pocu pressu à a sucità di guadagnà torna appena di tempu pà calchì sittimana, o ancu calchì mesi. Sicondu i mezi spicializati, ùn hè ancu una missa in liquidazioni schietta, ma parmetti soca d'appruntà st'affari. Sabbatu, in Aiacciu, un custatu di rumpitura hè statu presu in contu da i raprisintanti di u mondu socioecunomicu di l'isula. I socioprufiziunali di Corsica Suttana ani dicisu dopu à un'assemblea ghjinirali di cundannà cù forza l'atti di u Statu, dopu à l'incidenti gravi accaduti in prifittura di Bastia. Ani sceltu dunqua di suspenda tutti i discussioni in corsu cù i raprisintanti di u Statu annant'à u cunflittu di a SNCM. Invitani tutti i capi d'intrapresa à aduniscia si stamani à 10 ori ind'i camari di cumerciu. Jean André Miniconi pà a CGPME Corsica, hè statu putenti quant'è Domy Subrini (veda in altrò) ind'a riazzioni.
U stemi à senta.
Sur le même sujet
