Hôpital d'Ajaccio : Laurent Marcangeli demande à être reçu par la ministre de la Santé
(A redazzioni d'Alta Frequenza) - A zerga hè putenti à l’uspidali d’Aiacciu, induva i parsunali CFDT è CGT di u stabilimentu sò in greva dipoi u principiu di a sittimana. Erani più di centu ssu ghjovi pà manifistà in carrughju è scuntrà u prifettu di Corsica, pà prisintallu a situazioni propiu difficiuli ch’è no emi dighjà amintatu nant’à i nostri ondi è dumandà a numinazioni di un mediatori. I parsunali in greva dinunziani l'attitudini di u ministeru di a Saluta chì, d'appressu à elli, tomba u so uspidali senza sustenalu com'ellu si devi, ch'ella sia grazia à mezi finanziari o cù a numinazioni di direttori cumpetenti. Dopu un intrattenu cù u direttori di cabinetu di u prifettu di Corsica, postu chì Christophe Mirmand era assenti, hè propiu scuntenta chì a dilegazioni si n'hè andata da u Palazzu Lantivy senza mancu un puntu pusitivu. Dopu à ssu scontru in prifittura, i sindicati sò stati ricivuti in casa cumuna d'Aiacciu da u diputatu è merri, chì hè dinò u presidenti di u cunsighju di survighjenza di l'uspidali. Un scontru chì quì inveci s'hè passatu bè trà i sfarenti parti. Laurent Marcangeli, chì susteni di una manera forti ssi parsunali, dumanda più cà mai à a ministra di a Saluta Marisol Touraine di ricevalu u più prestu pussibuli pà trattà ssu cartulari cumplicatu, dinunziendu à tempu a gistioni di quissu quì da u ministeru.
Steti à senta à Laurent Marcangeli.
