Hors de question de rejeter un Padduc aux antipodes du précédent, pour Corsica Libera
(A redazzioni d'Alta Frequenza) - 39 voti contru, 12 à prò : l'assemblea di Corsica hà dicisu stamani (ghjovi) di righjittà a muzioni di rinviu pruposta da u gruppu Rassembler pour la Corse. Dipoi parechji sittimani in fatti, s'hè risintutu ricullà tinsioni inghjiru à un ducumentu cusì impurtanti chì hè u Padduc. A diritta, ùn hè più un scoop, hà fattu sapè dipoi parechij sittimani a so uppusizioni à u ducumentu com'ellu hè scrittu in ssu mumentu. Hà pruvatu, grazia à una muzioni di rinviu, d'ùn studià micca ssu cartulari oghji. U gruppu a spiegarà à l'uccasioni di una cunfarenza di stampa data à meziornu, ma Stéphanie Grimaldi stamani ind'a so spiegazioni di votu hà datu i raghjoni essenziali chì portani ssu ricusu di u Padduc. D'appressu à ella, hè u tempu chì hà mancatu u più pà u studiu di un ducumentu cusì cumplessu com'è u Padduc attuali. I naziunalisti ani ghjucatu un rollu ditarminanti in ssa situazioni. À l'uccasioni di una cunfarenza di stampa data calchì ghjornu fà in fatti, u gruppu Femu a Corsica avia annunziatu a so uppusizioni chjara à u ducumentu d'oghji. U gruppu naziunalistu ùn hà micca dumandatu di rimandà ss'asamini, ma hà da intruducia ben intesu à l'uccasioni di quissu quì parechji amendamenti di manera à avvicinassi à u più di "u spiritu primu di u Padduc". Corsica Libera hè dinò annant'à a listessa pusizioni. Sicondu l'altru gruppu naziunalistu, a scrittura attuali di u Padduc s'hè alluntanata troppu da ciò chì era statu prisintatu duranti u prucedimentu longu d'elaburazioni di u ducumentu. Eppuru, hè u parè di Ghjuvan Guidu Talamoni, ùn si tratta mancu appena di righjittà un prughjettu chì hè u cuntrariu di u Padduc scorsu, quillu prisintatu da a maghjurità Santini è Rocca Serra.
Steti à senta à Ghjuvan Guidu Talamoni.
