Incendie de Biguglia : 1 500 hectares détruits, feu circonscrit
(A redazzioni d'Alta Frequenza) - Puntu novu nant'à a situazioni in Biguglia dopu u focu chì hè partutu à meziornu da Ulmeta di Tuda chì hè impeghjuritu par via di un ventu forti. Ssu focu hà parcorsu, sicondu l'ultima valutazioni à 8 ori è mezu, à pocu pressu 1 500 ettari sicondu u prifettu di Corsica Suprana. Par via di un'accalmia assai lighjera di u ventu, i mezi assai impurtanti mubilizati sopralocu ci l'ani fatta à limità u focu sempri sicondu u prifettu di Corsica Suprana, chì ùn hè micca spintu ma chì ùn cresci più. Ci sò disguasti lighjeri nant'à calchì casa, ma semi passati vicinu à u peghju. Deci vitturi sò stati brusgiati à u nivellu di a sala Saint Sébastien. A sigaria Luciani, in bor'di strada Naziunali hè stata tocca da u focu. Sò oramai 270 omi chì sò sopralocu, cù rinforzi di u SDIS 2A, ma dinò mezi ghjunti da a Drôme. U ventu soffia quantunqua sempri assai forti nant'à u rughjoni è si pudaria rinfurzà mentri a sirata. À u nivellu di l'alloghji pà i parsoni chì sò stati ubligati à lacà i so casi o chì ùn poni più vultà ind'è elli par avà, ci sò parechji suluzioni :
- A sala di i festi di Biguglia vicinu à u Stadiu Dinelli (pudeti chjamà i sirvizi tennichi à u 0610087414)
- U COSEC di Furiani
- A sala pulivalenti di Lupinu in Bastia
Sur le même sujet
