Incendies : 400 hectares détruits à Albertacce
(A redazzioni d'Alta Frequenza) - U ventu viulenti chì soffia in Corsica hà avutu cunsiquenzi annant'à i fochi. In Corsica Suprana, pà i lochi d'Albertacce in Niolu, guasgi 400 ettari di machja sò stati brusgiati. U focu chì paria ammaistratu luni à sera hè partutu torna ssu marti dopu meziornu. I servizi di succorsu sperani ch'elli pudarani mubilizà i mezi aerei u più prestu pussibuli ind'a matinata, prima ch'ellu suffiessi torna u ventu. Nisun casa hè stata minacciata ancu s'è in certi settori, i parsoni sò stati ubligati à andassini di i so alloghji par misura di securità. I salvatori ramentani dinò chì ssi venti viulenti inghjennani marosuli è a prudenza a più maiò hè racumandata in mari è vicinu à i costi. Prudenza dinò annant'à i stradi cù arburi chì sò cascati, branchi o petri par asempiu pà certi lochi. Ci voli à essa prudenti ancu in cità, cù par via di u ventu ughjetti chì poni bulà com'è ghjilusii, vasetti di fiori o elementi di tetti chì si pudariani caccià è essa periculosi.
Sur le même sujet
