Incendies en Haute-Corse : la lutte se poursuit
(A redazzioni d'Alta Frequenza) - Guasgi 500 ettari di vegetazioni è parechji decini di casi sbiutati ! Eccu l’ultimu bilanciu di u focu viulenti chì hè partutu in a nuttata trà marti è marcuri trà i cumuni di Barbaghju è d’U Poghju d’Oletta. U ministru di l’Internu, Bernard Cazeneuve, hà vulsutu salutà in un cumunicatu « i spinghjifochi è i parsunali di a securità civili impignati cù curaghju pà luttà contr’à i fochi chì toccani in ssu mumentu u dipartimentu di Corsica Suprana ». Mezi umani è aerei numarosi sò sempri mubilizati nant’à ssu sinistru chì, infini, pudaria essa ammaistratu in a ghjurnata di pettu à a so evuluzioni, i cundizioni climatichi è u travaghju di sempri di i mezi di lotta. Ramintemi chì altri fochi numarosi sò stati censati ssu ghjovi nant’à u dipartimentu com’è in A Lucciana (15 ettari), o ancu in u Centru di a Corsica in Fucichja (40 ettari distrutti).
Sur le même sujet
