Incendies en Haute-Corse: le feu détruit plus d'une centaine d'hectares à Vignale
(A redazzioni d'Alta Frequenza) - Fochi sò partuti dipoi a fin di a matinata (marti) in Corsica Suprana. U più impurtanti s'hè dichjaratu versu 11 ori è 20 in bordu di strada in Vignale, ind'a valli di u Golu, è hà distruttu par avà più di centu ettari. Un sciffru chì pudaria essa più impurtanti, i fiari ùn essendu ancu ammaistrati. Mezi umani assai numarosi, una sissantina d'omi, ma ancu aerei, cù dui elicotteri chì lampani l'acqua, dui Tracker, quattru Canadair è un grossu avviò Dash agiscini sopralocu. Squadri farani stanotti una survighjenza, mentri chì i mezi aerei, s'ellu ci hè u bisognu, ripighjarani u so travaghju dumani matina. U sicondu, menu impurtanti s'hè dichjaratu appena dopu à meziornu in Pinia in Fium'Orbu, nanzi à a furesta. Setti ettari di vegetazioni ani brusgiatu. I spignifochi, i pumpieri di furesta è dui Pélican sò riisciuti à ammaistrà u focu. U terzu hè partutu ind'un settori chì volta parechji volti oramai par disgrazia, quillu di u lavu di Padule in Oletta, in u Nebbiu. Un ettari è mezu di vegetazioni hà brusgiatu. Bastavani i mezi umani pà ammaistrà ssu focu.
Sur le même sujet
