Jazz Equinoxe souffle ses quinze bougies dès ce soir à Bastia
(A redazzioni d'Alta Frequenza) - Quindicesima edizioni, dighjà, pà u fistivali Jazz Equinoxe in Bastia, chì principia ssu ghjovi à sera pà compia si sabbatu à u teatru di Bastia. Un fistivali chì porta appena mali u so nomu, parchì l'urganisatori ani dicisu di francà i cunfini di u jazz pà empia u so prugramma malgradu calchì difficultà finanziaria. Stasera, u fistivali s'hà da apra cù u cuncertu di a sinsazioni feminili di u mumentu annant'à a scena pop è rock francesi, HollySiz, chì hè un gruppu ma a biundissima Cécile Cassel hè propiu davanti à tutti i so altri cumpagni. In prima parti, hè un artistu corsu, jazz quì, chì sarà annant'à a scena di u teatru, l'aiaccinu Paul Mancini, accumpagnatu da dui musicanti bastiacci. Si passa dopu à u rythm and blues u vennari, cù Dave Finnegan chì sarà accumpagnatu da i Mighty Mustangs, tuttu què cù u ghitaristu jazz svedesi Ulf Wakenius in prima parti, chì hà spartutu duranti a so carriera a scena cù u miticu Oscar Peterson, par asempiu. Infini, sabbatu, u fistivali si compiarà cù l'americani di u Golden Gate Quartet, un gruppu miticu di gospel chì fistighjeghja i so ottanta anni quist'annu è chì principia a settesima annata di un ghjiru d'addiu ind'u mondu sanu.
Steti à senta à Michel Maestracci, l'urganisatori di ssu fistivali.
