Jean Guy Talamoni : Simu ghjunti quì !
(A redazzioni d'Alta Frequenza) - Ghjuvan Guidu Talamoni, presidenti di l'Assemblea di Corsica, Gilles Simeoni, presidenti di un esecutivu custituitu da Francescu Sargentini, Fabiana Giovannini, Marie Antoinette Maupertuis, Agnès Simonpietri, Ghjuvan Cristofanu Angelini, Ghjuvan Filici Acquaviva, Saveriu Luciani è Josepha Giacometti! Sò i deci nomi ch'è vo sintareti torna assai pà i dui anni chì venini. I dui presidenti è a squadra dirighjenti ani presu in fattu arimani a direzzioni di a cullittività a più impurtanti di l'isula, quilla chì cumanda l'avvena di a Corsica inde tutti i duminii essenziali, ecunomichi, suciali è culturali. Deci nomi ch'è vo sintareti oramai guasgi tutti i ghjorni, vistu chì i prublemi ad arrigulà sò immensi è numarosi sò quilli assai urghjenti. Cartulari marittimu cù Ghjuvan Filici Acquaviva, principiu di i discussioni cù u Statu annant'à i famosi urdinanzi di a riforma tarrituriali, è què cù tutta a squadra dirighjenti, i ghjorni di l'almanaccu di ssi dui anni chì venini ani da passà in furia pà i dirighjenti novi di a Corsica. Dopu à l'emuzioni, eccu stratti di i dui presidenti ind'a so parti a più pulitica.
Eccu un strattu di u discorsu di Ghjuvan Guidu Talamoni.
Sur le même sujet
