Jean-Michel Baylet en Corse : Gilles Simeoni satisfait
(A redazzioni d'Alta Frequenza) - L'ochji inde l'ochji ! Hè cù ssa sprissioni micca banali chì Jean Michel Baylet hà fattu un puntu nant'à l'evuluzioni di a riforma in Corsica. U cumprumessu, ch'ella sighi in Corsica o in Parighji ! Eccu comu u ministru di l'accunciamentu di u tarritoriu hà qualificatu u prucedimentu longu chì sbuccarà, nanzi a fini di a mandatura, nant'à un prughjettu di legi di ratificazioni chì hà da integrà i trè urdinanzi finanziaria, fiscali è ancu istituziunali. Ss'ultima, si sà, avia postu un prublema parchì ci vulia ch'ella fussi in armunia assuluta cù a legi di u 2015, a legi NOTRe integrendu a criazioni di a cullittività di Corsica. Par ùn cunnoscia a sintenza di u Cunsighju di Statu, ci hè vulsutu dunqua à custruiscia insemi ssa famosa urdinanza chì cunvinissi à tutti i parti. Gilles Simeoni era cuntentu parchì hè stata signata ssu marti l'ultima cunvenzioni di u PEI, u famosu prugramma eccezziunali d'investimentu, chì và da u 2017 fin'è u 2020. Ssi 430 millioni d'auri quantunqua ùn currispondini micca à un impegnu finanziariu novu di u Statu; hè custituitu tuttu simpliciamenti da u restu di i soldi micca utilizati di u PEI iniziali, i famosi dui milliardi d'auri cuntrattualizati in u 2002. Ma ùn hè micca u solu puntu di cuntintezza pà u presidenti di l'Esecutivu, chì ci l'hà fatta à integrà trè punti chì li parini essa di primura.
Steti à senta à Gilles Simeoni.
Sur le même sujet
