L'Europe et la Corse: l'avis de Roccu Garoby
(A redazzioni d'Alta Frequenza) - Hè oghji, u 9 di maghju, l'anniversariu di a nascita ufficiali di l'Auropa. Ssa data hè stata scelta in ricordu di a dichjarazioni di u Ministru di l'Affari stragneri francesi Robert Schuman chì hà prupostu u 9 di maghju di u 1950 à i paesi aurupei chì s'erini battuti in 14-18 è 39-45 di gistiscia in cumunu i so risorzi di carbonu è d'aciaghju ind'un urganisazioni aparta à l'altri paesi d'Auropa chì a vulariani. Ssa pruposta, cunniscita com'è a "dichjarazioni Schuman", hè cunsidarata com'è l'attu di nascita di l'Unioni aurupea. In Aiacciu, s'hè piuttostu aspittatu a dumenicata pà urganizà annant'à u situ di a Parata a Ghjurnata di l'Auropa. Ssa manifestazioni sarà diretta da l'associu L'Europe en Corse. Cunfarenzi, mostri, diffusioni di filmi, attelli pà i zitelli, parechji attività sarani ufferti à u publicu dumenica pà fistighjà ssa data impurtanti è dà li tutta l'impurtanza ch'ella merita in ss'annata d'alizzioni aurupei. Emi sceltu, à u mumentu ch'ellu si dici tuttu è u so cuntrariu annant'à ciò chì hè oghji l'Auropa è annant'à i cunsiquenzi ch'ella inghjenna annant'à a vita di tuttu ognunu di racoglia u parè di dui ghjovani corsi ingaghjati in pulitica. Roccu Garoby hè pà contu soiu un autonomistu, è a mostra di manera chjara. Cunnosci assai bè l'istanzi aurupei par avè ci travaghjatu dipoi parechji anni à fiancu à François Alfonsi. Chì hè par ellu a leia chì hè o chì devi essa intrattinuta trà a Corsica è l'Auropa?
U stemi à senta.
