L'interdiction d’emploi du feu en Corse avancée au 29 juin
(A redazzioni d'Alta Frequenza) - Ind'un cumunicatu, u prifettu di Corsica, prifettu di Corsica Suttana, è u prifettu di Corsica Suprana facini sapè chì par via di u passaghju di u Ghjiru di Francia di bissicletta, a data d'interdizzioni pà fà fochi missa in ballu da un arristatu prifetturali hè avanzata quist'annu nant'à tuttu u tarritoriu di a Corsica à u 29 di ghjunghju di u 2013, è vali fin'è a fin di l'istati. Un'interdizzioni chì principia di regula à partasi di u 1a di lugliu, ma chì pò essa avanzata par asempiu par via di i cundizioni climatichi. L'interdizzioni di fà fochi tocca à tuttu mondu. Duranti issu periudu, hè pruibitu di brusgià frà altru vegetali, pruibitu di fà fochi in furesta o ancu d'utilizà barbecue o arnesi pà riscaldà (o tandu à menu di 5 metri di una custruzzioni smachjata, cù acqua currenti è elettricità). Hè pruibitu dinò di fumà ind'i furesti, i scarsali è ind'a machja. U fattu d'ùn rispittà micca l'interdizzioni di fà fochi pò ingaghjà a rispunsabilità civili di l'autori è u pò purtà à essa cundannatu da a ghjustizia penali. Rammintemi chì a legi privedi amendi pudendu andà fin'è 100 000 auri, ma dinò cundanni à a prighjò.
Sur le même sujet
