L'origine criminelle des incendies de Vero et Bastelica confirmée
(A redazzioni d'Alta Frequenza) - Puntu novu annant'à a situazioni cuncirnendu i fochi di Veru è Bastelica, cù mezi umani è aerei numarosi sempri mubilizati. Pà u prima citatu, a superficia parcorsa da i fiari ferma di guasgi centu ettari ; hè in traccia d'essa ammaistratu sicondu i spignifochi, chì travaghjarani sopralocu stanotti. U sicondu, più prublematicu, hà vistu a so superficia parcorsa ridutta di mità, passendu da 80 à 40 ettari. U prifettu di Corsica, Christophe Mirmand, hà bulatu in fin di dopu meziornu sopra ssi lochi pà fassi un'idea più pricisa di i disguasti è usservà u travaghju di tutti i squadri in postu. Hà cunfirmatu l'urighjini criminali di ssi dui fochi è chì un'inchiesta, diretta da u prucuratori di a Republica d'Aiacciu, hè stata aparta. Da un'antra banda, dui altri fochi sò stati arrighjistrati annant'à u dipartimentu ssu luni dopu meziornu. In Alata, trà 5 è 6 000 m2 sò stati distrutti vicinu à un lutissamentu in u locu dittu i Setti ponti ; spignifochi, un elicotteru chì lampa l'acqua è u Dash sò intarvinuti pà spinghja u focu. Infini, in u settori di u Stilettu, 1 500 m2 sò partuti in fumu ; i mezi umani mandati sopralocu ani ammaistratu in furia i fiari.
Steti à senta à Christophe Mirmand, u prifettu di Corsica.
