La CAB approuve la prorogation de la DSP de l'eau avec une augmentation de prix
(A redazzioni d'Alta Frequenza) - Ssu luni, u Cunsighju Cumunitariu di a Cumunità d’Agglumerazioni di Bastia hà validatu a prulungazioni pà un’annata in più di a DSP attuali di a distribuzioni è di l’assanimentu di l’acqua, fora di u votu contru di l’uppusizioni. Ssa prulungazioni, dopu à una chjama à l’ufferti chì ùn hà datu nulla in ssu duminiu, lia fin’è a fin di u 2015 a CAB à l’Uffiziu Idrolicu di a Corsica, chì hè à tempu unu di i dui candidati micca ritinuti par via d’ufferti chì ùn cunviniani micca è troppu mudificativi di pettu à i reguli difiniti. Una prulungazioni chì ùn si farà micca senza cumpensazioni, prima cù 698 000 auri virsati à l’Uffiziu, contr’à 640 000 auri ind’u quadru di a prima prulungazioni in u 2014, eppo cù dinò 150 000 auri pà a migliurazioni di u serviziu. Ssi 150 000 auri sarani finanziati da una crescita di 2% di u prezzu di l’acqua, vutata dinò ella ind’i listessi cundizioni. Un’annata in più chì sarà missa à cuntribuzioni pà pudè dicida di manera difinitiva di a suluzioni chì sarà aduttata, ch’ellu si trattessi di una DSP nova o di un passaghju in regia. I parsunali, chì pariani cuntenti in un prima tempu, ani dicisu di fà greva à partasi di ssu marti par via di a situazioni chì ùn saria micca chjara à u nivellu di a transizioni à u 2 di ghjinnaghju.
Steti à senta à François Tatti, u presidenti di a CAB.
