La cage sans les oiseaux !
(A redazzioni d'Alta Frequenza) - A gabbia senza l'acelli ! Hè ss'infrasata, ditta à l'epica da un certu Benito Mussolini chì veni in menti à u sindicatu studientinu A Cunsulta di a Ghjuventù Corsa, dopu à i parolli di u direttori di a redazzioni di L'Express, Christophe Barbier, nant'à a missa in ballu di un statutu di residenti ind'è noi pà pruvà à stancià a speculazioni fundaria. Ssu dibattitu, chì prumetti d'essa infiaratu quandu si vedi i pusizioni à parechji in Corsica è in altrò dopu à i dichjarazioni di u presidenti di l'esecutivu Paul Giacobbi, chì batti à prò di ssu statutu, hè statu ammintatu calchì ghjornu fà in a radiu Europe 1. Invitatu ind'u so studiu, Christophe Barbier hà qualificatu ssu statutu di "misura d'ostracismu", cunsigliendu ancu "à quilli chì sò nati ind'un rughjoni, chì ci vularia forsa ch'elli andessini à scopra u mondu è chì s'è l'immubiliari hè appena troppu caru duva omu hè natu, hè l'uccasioni tandu d'andà à stà in altrò […] arricchiscia si è vultà in paesi à ssu mumentu cù i mezi di cumprà". Parolli chì ani scandalizatu assai A Cunsulta di a Ghjuventù Corsa, chì dici torna nant'à ssu sughjettu in un cumunicatu chì "l'aghjettivu "culuniali" hè sempri d'attualità". À a dumanda, seti pronti à parta da a Corsica pà vultà ci più tardi cù i mezi pà pighjà vi una casa, a risposta di u sindicatu hè più cà chjara, bella sicura.
Ecoutez Antone Casanova, pour A Cunsulta di a Ghjuventù Corsa.
