La CGT Santé de la Haute-Corse a tenu son second congrès
(A redazzioni d'Alta Frequenza) - Ssu luni, in Bastia, a CGT Saluta di Corsica Suprana, purtata da Josette Risterucci, hà urganizatu u so sicondu cungressu, suvitatu guasgi da 70 membri di i parsunali si saluta di u dipartimentu. À u prugramma, prublematichi naziunali, com'è l'ecunumii dumandati à a Securità Suciali, è di colpu, à l'uspidali, ma dinò prublematichi lucali. È s'è i casi di l'uspidali di Calvi è Tattone sò stati ammintati duranti ssu cungressu, hè torna una volta u cartulari pulemicu di l'uspidali di Bastia chì hè statu à u centru di i discussioni. Un uspidali chì vedi i so parsunali in arrestu malatia senza essa rimpiazzati nanzi à trè mesi d'arrestu, è chì cunnosci di più in più difficultà à pagà i so partinarii sicondu u sindicatu. Tuttu què cù da un'antra banda u rinnovu di l'uspidali, chì ùn hè ancu à cumincià, è cù un imbrogliu novu à u nivellu di i soldi. In fatti, u guvernu cunsidareghja chì i sei millioni d'auri dati di dicembri à l'uspidali pà copra i spesi di funziunamentu devini essa cacciati da i 29 millioni d'auri di u COPERMO, u Cumitatu interministiriali di parfurmenza è di a mudernisazioni di l'ufferta di curi. A CGT hè chjara, hè impussibuli di pinsà ch'elli sarani cacciati ssi sei millioni d'auri di i 29 millioni di chì ùn s'hè mancu vistu un centimu.
Steti à senta à Josette Risterucci pà a CGT Saluta di Corsica Suprana.
Sur le même sujet
