La Communauté d'Agglomération de Bastia a adopté son budget primitif 2014
(A redazzioni d'Alta Frequenza) - Ssu marcuri, u cunsighju cumunitariu di a Cumunità d'Agglumerazioni di Bastia s'hè adunitu torna, cù un cartulari di quilli maiò à u prugramma, l'aduzzioni di u bughjettu primitivu 2014. Quissu quì hè d'85,9 millioni d'auri, spartuti trà 50,5 millioni d'auri pà u bughjettu principali, 11,8 millioni pà u bughjettu di l'acqua, 17,1 millioni pà l'assanimentu è 6,5 pà i trasporti. Un bughjettu qualificatu di transizioni parchì stampatu da a mandatura scorsa di sicuru, senza crescita di a prissioni fiscali è cù un scopu unicu, quillu d'assicurà u bon funziunamentu di a CAB ind'un tempu bughjettariu difficiuli. Com'è a sittimana scorsa, François Tatti hà fattu falà calchì fiacchina contr'à l'anziana maghjurità, critichendu u fattu di passà di manera troppu impurtanti pà imprestiti, marghjini propiu debbuli annant'à u bughjettu principali o a debbita di 35,7 millioni d'auri chì hà da inghjinnà di manera ubligatoria un rimbursamentu di 3,9 millioni d'auri in u 2014. Ci sarani sfarenti studii pà difiniscia i mezi di ritruvà una bona saluta finanziaria, l'investimentu essendu tinutu à u minimu pussibuli in u 2014. I quattru bughjetti sò stati vutati à l'unanimità menu i trè voci micca prununziati di Jean Zuccarelli, Marie Paule Houdemer è Francis Riolacci.
Steti à senta à François Tatti, u presidenti di a CAB.
Sur le même sujet
