La Communauté d'Agglomération de Bastia dans une situation financière inquiétante
(A redazzioni d'Alta Frequenza) - Ssu marti, u studiu finanziariu cumandatu da a Cumunità d'Agglumerazioni di Bastia hè statu prisintatu è dibattutu duranti u cunsighju cumunitariu. Lighjendu ssu studiu, tuttu ognugnu s'avvedi chì a situazioni finanziaria di a CAB ùn hè mancu appena famosa. In fatti, in cinqui anni, a debbita di a CAB hè crisciuta di 54%, passendu da 12,7 millioni d'auri in u 2009 à 19,6 millioni privisti in u 2014. S'è ssa debbita ferma sottu à a media par abitanti, diventa di più in più difficiuli quandu hè liata à i mezi di rimbursamentu, raprisintati par asempiu da u risparmiu senza ritinuti, chì hè calatu assai à 1,3 millioni d'auri in u 2013, ciò chì raprisenta 15,1 annati pà falla finita cù a debbita è ciò chì voli dì chì a CAB ùn pò più avè torna una debbita più forti, fora di u fattu d'allargà torna i so capacità pà riducia a so debbita chì sò dighjà ghjunti à un nivellu criticu, fin'à quandu u risparmiu ùn andarà micca meghju, tuttu què cù mezi dati da u Statu chì calani di più in più. È pà ritruvà culori, mezi sò stati amintati, quillu di l'ecunumia strutturali, vali à dì una calata di a qualità di u serviziu publicu, è un antru chì ùn farà micca piacè, quillu di a crescita di a pressioni fiscali, vali à dì di l'impositi annant'à l'alloghju o annant'à u fundariu par asempiu. Tuttu què cù una situazioni cumplicata à gistiscia, quilla di a ZAE d'Erbaghjolu, chì ùn hà micca successu ind'è l'intrapresi è cù ricetti chì erani dighjà stati bughjettizati da a squadra scorsa. S'è a fini di i pagamenti à u 31 di dicembri, ch'ellu temi u merri di Bastia Gilles Simeoni, duvaria essa schisata, ci sarani certi sacrifizii com'ellu a ci spiega François Tatti, u presidenti di a CAB.
Steti à senta à François Tatti.
