La Communauté d'Agglomération de Bastia proroge d'un an la DSP de l'eau avec l'Office Hydraulique
(A redazzioni d'Alta Frequenza) - Postu chì nisun candidatu hà accittatu di fà calchì sforzu, a Cumunità d'Agglumerazioni di Bastia parti torna pà un'annata nova di dilegazioni di serviziu publicu di l'acqua cù l'Uffiziu Idrolicu di a Corsica. Dopu à parechji critichi è attesi, u scagnu di a CAB hà dicisu ssu luni di ssa suluzioni. Una scelta mutivata, d'appressu à François Tatti, u presidenti di a CAB, da u fattu chì l'ufferti di l'Uffiziu Idrolicu è di Veolia, i dui candidati chì si sò prisintati, ùn cunvinissini micca. Prima puntu pessimu, a vulintà di i dui entità di mudificà i reguli prisintati da a CAB, par asempiu à u nivellu di i travaghji. U sicondu, u più impurtanti dinò è soprattuttu pà l'abitanti di a CAB, hè u prezzu di l'acqua, chì saria statu assai crisciutu, trà 12 è 14% pà Veolia è 10% à principiu pà l'Uffiziu Idrolicu, a crescita privista pudendu cullà fin'è 20%. Di fattu, prulungà era a suluzioni chì custava u menu soldi infini, ancu s'è ss'annata di prulungazioni duvaria custà 650 000 auri à u minimu à a CAB pà ciò chì tocca i cumpensazioni à virsà à l'OEHC. I dui candidati devini travaghjà torna u so cartulari, ma pari ch'ella ci sighi una tendenza abbastanza chjara ind'è l'esecutivu di a CAB, vali à dì una prifarenza di più in più sicura pà a suluzioni di una regia intercumunali chì custaria menu è chì pudaria impidiscia una crescita troppu impurtanti di u prezzu di l'acqua, chì crisciarà à u più di 2% pà l'annu chì veni.
L'intervista videò di François Tatti nant'à ALTA TV.
Steti à senta à François Tatti, u presidenti di a CAB.
Sur le même sujet
