La forêt corse est en danger, pour le STC de l'ONF
(A redazzioni d'Alta Frequenza) - Cunfarenza di stampa ssu ghjovi di u STC di l'Uffiziu Naziunali di i Furesti di Corsica, chì hà vulsutu amintà parechji punti chì li faci dì chì a furesta isulana hè in periculu. In fatti, u sindicatu naziunalistu hà vulsutu lampà una chjama à l'eletti pruprietarii, vali à dì a CTC è i cumuni furestieri, pà ciò chì tocca i minacci contr'à ssu patrimoniu è a sparizioni prugrammata d'appressu à ellu di i missioni di serviziu publicu furestieru. L'appiecazioni di u regimi furestieru hè rimissa in causa sicondu u STC da a pulitica d'austerità di u Statu. In fatti, u prughjettu di legi di finanzi 2015-2017 privedi u trasferimentu di parechji millioni d'auri di dutazioni di u Statu pà l'ONF à a carica di i cumuni furestieri, ciò chì si traduciaria pà una crescita forti di i cuntribuzioni pagati da ssi listessi cumuni, assai povari pà a maiò parti, à l'Uffiziu Naziunali di i Furesti. Altru puntu chì hè statu trattatu, a fini di a Dilegazioni di Serviziu Publicu di 12 annati privista di dicembri di u 2015, liendu a CTC à l'ONF. Ramintemi chì l'Uffiziu è u so parsunali di dirittu privatu rializeghjani i travaghji furestieri annant'à i 50 000 ettari di furesti dumaniali chì appartenini à a Cullittività di Corsica. Postu ch'ellu hà avutu nisun nutizia di l'Esecutivu di Corsica cuncirnendu u rinnovu pussibuli di st'impegnu quì, u STC s'inchieta è dinunzia d'altrondi u fattu chì a Direzzioni Generali di l'ONF ùn fessi nulla à ssu nivellu quì. A quistioni di l'impiegu è di u ricrutamentu à l'ONF hè stata amintata dinò ; ci vultaremi ind'i nostri nutiziali chì venini.
Steti à senta à Claire Vescovali, pà u STC ONF.
Sur le même sujet
