La Ligue des Droits de l'Homme a rencontré le procureur général de Bastia
(A redazzioni d'Alta Frequenza) - Ssu marcuri, una dilegazioni di a Lega di i Diritti di l'Omi hè stata ricivuta da u prucuratori ghjinirali di Bastia, Marc Désert, calchì ghjornu dopu avè lacatu ssa funzioni. Un scontru chì hà parmissu à a LDH di dì torna a so indignazioni di pettu à i parolli chì ani toccu, à u nivellu naziunali, a ministra di a Ghjustizia Christiane Taubira, a so cundanna di i tiri di rucchetta contr'à dui gendarmerii à a fin di a settimana scorsa, è a so inchietudini pà ciò chì tocca a criminalisazioni di a sucità corsa. Inchietudini, a parolla volta dinò pà ciò chì cuncerna u statutu dittu di "repenti", chì laca a porta aparta d'appressu à a LDH à un risicu di manipulazioni di a ghjustizia da pussibuli parsoni simuli, cù un desiquilibriu trà accusazioni è difesa. A quistioni di a scrizzioni di i parsoni, par asempiu pà ciò chì tocca i marchi genetichi, hè stata ammintata dinò, a LDH essendu contr'à ssi metudi. Infini, l'avvicinamentu di i prighjuneri hè statu trattatu, a LDH rammintendu chì ssu cartulari devi essa purtatu da una vuluntà pulitica è micca solu da un simplici affari di gistioni penitenziariu.
Steti à sena l'impressioni d'André Paccou, rispunsevuli di a Lega di i Diritti di l'Omi in Corsica, dopu à ss'appuntamentu.
