La ministre des sports reçoit le collectif des victimes de la catastrophe de Furiani
(A redazzioni d'Alta Frequenza) - Ci sarà un appuntamentu impurtanti dopu meziornu (vennari) pà u cullettivu di i vittimi di a catastrofa di Furiani, accaduta u 5 di maghju di u 1992, inghjinnendu a morti di diciottu parsoni è millai di feriti. U cullettivu, à trè ghjorni di u vintiduiesimu anniversariu di a catastrofa, porta sempri a listessa rivindicazioni, vali à dì a santuarisazioni di a data di u 5 di maghju ind'u calendariu di u ballò francesi, da fà chì più nisun scontru sighi ghjucatu ssu ghjornu quì, ciò chì sarà malgradu tuttu u casu in Lega 2 torna quist'annu. Ssa rivindicazioni, com'è quilla d'azzioni pà fà campà u ricordu, sarà difesa duranti un appuntamentu cù Najat Vallaud Belkacem, ministra di i Diritti di i Donni, di a Cità, di a Ghjuventù è di i Sports. Sarà u primu scontru ministiriali dipoi l'alizzioni di François Hollande à a presidenza di a Republica, postu chì l'anziana ministra di i Sports, Valérie Fourneyron ùn hà mai ricivutu u cullettivu. Da un'antra banda, ci sarà una minuta di silenziu stasera nanzi à u principiu di a partita trà u SC Bastia è Lille.
