La relégation du SC Bastia en National 1 confirmée ce matin
La relégation du SC Bastia en National 1 confirmée par la FFF
(A redazzioni d'Alta Frequenza) - L'ultimi speri di u SC Bastia sò svaniti ssu marti da mani ind'i scagni di l'alti istanzi di u ballò francesi. Duranti u so cunsighju d'amministrazioni, a LFP hà validatu a cullata in L2 di u Parighji FC, ciò chì faci chì u SC Bastia fala dunqua d'una manera difinitiva in Naziunali 1. A chjama di l'intraprenadori in brama di ripighjà u club ùn hè dunqua micca stata intesa. Ci voli à dì chì u pianu di salvezza ghjunghjia appena tardi, in tutti i casi dopu à i dui passaghji davanti a DNCG, u gendarmu finanziariu di u ballò. U club bastiacciu dumandava l'urganisazioni d'una Liga 2 cù 21 clubs, ma ss'ultimu hè bè prisenti nant'à u calendariu di a Naziunali 1 oghji. I dirighjenti ani fattu un ricorsu davanti u tribunali amministrativu pà pruvà à cambià a tindenza, ma i speri sò propiu debbuli, o ancu persi sicondu i pruprietarii futuri pussibuli dichjarati di u club. Oghji, l'avvena di u SC Bastia hè scunnisciutu. I partiti di i dui primi ghjurnati di u campiunatu di Naziunali 1 sò dighjà stati rinviati da a FFF. U SC Bastia passarà vennari davanti a DNCG pà prisintà u so bughjettu pà u campiunatu di Naziunali 1. Ma, a minaccia di a bancarotta si risenti propiu dighjà, postu chì di pettu à u so debbitu assai impurtanti, u club ùn pudarà micca riparta in Naziunali 1 sicondu i pruprietarii futuri pussibuli. Una bancarotta chì saria un dannu suciali mai vistu o guasgi nant'à l'isula cù più di sittanta disimpieghi. Malgradu tuttu, l'azziunari attuali, silenziosi, appruntariani à l'appiattu un bughjettu pà u Naziunali 1.
Sur le même sujet
