La résidence secondaire plastiquée à Venzolasca appartient à un secrétaire national du PRG
La résidence secondaire plastiquée cette nuit à Venzolasca appartient au secrétaire national du PRG
(A redazzioni d'Alta Frequenza) - A residenza sicundaria chì hè stata plasticata stanotti (vennari à sabbatu) in Vinzulasca (Corsica Suprana) hè quilla di Guilhem Porcheron, secretariu naziunali di u PRG. L'identità di a vittima hè stata cumunicat da a federazioni di Corsica Suprana di u Partitu Radicali di Manca chì cundanna cù forza ss'attentatu. Sicondu i primi custatazioni di i gendarmi, i disguasti sò assai impurtanti. Ss'attentatu ùn hà inghjinnatu nisun ferita à nimu è intarveni u lindumani dopu à a cumunicazioni di Christiane Taubira. A ministra di a Ghjustizia annunziava par asempiu chì u numaru d'attentati in Corsica ùn era mai statu cusì bassu dipoi trenta anni.
Cumunicatu di a federazioni di Corsica Suprana di u Partitu Radicali di Manca
"Cundannemi cù a forza a più maiò l'attu vigliaccu è criminali chì hà distruttu ind'a notti di u 23 à u 24 di ghjinnaghju una casa nant'à a cumuna di Vinzulasca. S'ellu hè lighjittimu d'essa cuntenti di a calata significativa di u numaru d'attentati ss'ultimi anni, ssu gennaru di viulenza par disgrazia ùn hè ancu sradicata nant'à a nostra isula, ed hè par quissa ch'ellu hè impurtanti di cuntinuà à cumbattala cù a ditarminazioni a più maiò. Hè ghjustu appuntu micca accittevuli di veda certi avanzà ss'ultimi tempi a pussibilità di una ripresa di l'attentati in sustegnu à i so esigenzi pulitichi. A federazioni susteni à più pudè u so cullegu è amicu Guilhem Porcheron, secretariu nazionali di u PRG è vittima di ss'attentatu".
