Langue corse : la réponse calme de Jean-Guy Talamoni

(A redazzioni d'Alta Frequenza) - Hitchcock avia missu 109 minuti à sviluppà annant'à u screnu maiò u so spavintevuli Psychose. Novi minuti di un discorsu in lingua corsa prununziatu da u novu presidenti di l'Assemblea di Corsica, Ghjuvan Guidu Talamoni, sarani bastati à inghjinnà un effettu simuli o ancu torna di più riisciutu ind'è una parti di l'upinioni publica francesi. S'è annant'à i reti suciali, gennaru di banconu senza fini, i currachji chì rachjani, i falsi maghjini faciuli è i stradi torti cuncirnendu a Corsica è i corsi sò numarosi da a parti d'anonimi chì parlani assai, più significativi sò i riazzioni di certi chì volini dà lizzioni d'upinioni. Podassi cuncintrati annant'à a forma di u discorsu, i so analisi ani toccu certi volti un antru fondu cà quillu di u discorsu. Certi ghjurnalisti ani cunsidaratu di fattu ch'ella si trattava di un'uffesa à i valori di a Republica, o ancu di a nascita di un currenti senofobu. Pà ciò chì tocca l'omi è i donni pulitichi, s'è certi si sò cuntintati di ramintà simpliciamenti chì u francesi hè a sola lingua di a Republica, à l'usu di un Florian Philippot, Jean Luc Mélenchon o Alain Juppé, a Corsica avendu a virtù d'aduniscia omi pulitichi da a strema manca à a strema diritta inghjiru à un listessu missaghju, altri sò andati più luntanu. François Fillon hà ghjudicatu in fatti chì in u so discorsu, Ghjuvan Guidu Talamoni avia insultatu a storia di a Francia, mentri chì a senatrici PS Marie Noëlle Lienemann hà dumandatu, di manera sulenna, sanzioni contr'à Ghjuvan Guidu Talamoni, d'altri parlendu di una Republica chì ùn si devi micca lacà marchjà addossu. Certi ani ancu cacciatu à Jean Pierre Chevènement, mudelu di tulerenza è di fratillanza ver di a Corsica, da u cimiteriu di l'elefanti pulitichi par ch'ellu dicissi tuttu u bè ch'ellu pensa di ssu cambiamentu di puteri in Corsica. Tutti ss'intarvinanti t'ani un puntu cumunu bè pricisu : pinsà chì l'usu di una lingua regiunali sighi una pruvucazioni. À tal puntu ch'ellu faci sminticà l'altri fattori, assai più riali è quì subbitu, di rumpitura di l'unità naziunali francesi. Divintatu nimicu numaru unu di una parti di i puliticanti francesi è di un pezzu di a pupulazioni francesi, Ghjuvan Guidu Talamoni si sprimi. Si pò aspittà à una situazioni chì s'hà da infracicà trà a Corsica è Parighji ?

Steti à senta à Ghjuvan Guidu Talamoni.