Le collectif des victimes de Furiani s'est réuni en assemblée générale
(A redazzioni d'Alta Frequenza) - Sabbatu, u cullittivu di i vittimi di a catastrofa di Furiani hà adunitu guasgi una cinquantina di parsoni, vittimi, i so famighji o simpatizanti com’è l’anzianu intrenori di u Sporting Club di Bastia Frédéric Hantz pà a so assemblea generali. L’uccasioni d’eleghja un scagnu novu è ringhjuvanitu ind’a cuntinuità di l’anzianu, postu chì Josepha Guidicelli, assai attiva ss’ultimi anni cù a so surella Lauda, hà presu a seguita di a so mamma, Vanina, à a presidenza di u cullittivu, chì t’hà oramai un vici presidenti in Marseghja, Bastien Dumas, fighjolu dinò ellu di una di i diciottu parsoni chì si ni sò andati par via di ssu drama. Un’assemblea generali chì hà parmissu dinò è soprattuttu d’amintà l’avanzati è l’iniziativi à vena. Di fattu, s’ellu ferma assai à fà à u nivellu minisitiriali è spurtivu ind’è l’autorità naziunali di u ballò, parechji entità ani da rinfurzà u so umaghju, com’è par asempiu a Liga Corsa di Ballò chì hà da cuurdunà meghju i manifistazioni inghjiru à u ballò missi in ballu ogni annu à u nivellu righjunali, o u Sporting Club di Bastia purtarà una maglia nera contr’à Saint Etienne pà a 35ima ghjurnata di u campiunatu di Liga 1, calchì ghjornu nanzi à u vintitreesimu anniversariu di u drama in u 2015. Ci sarà dinò un avvicinamentu cù i famighji di i vittimi di a catastrofa d’Hillsborough, in Ingliterra, induva 96 sustenidori di Liverpool sò morti in u 1989.
Steti à senta à Didier Grassi pà u cullittivu.
